Укытучының алтын еллары

Ул 1929 елның октябрендә Ярмәкәй районының Рәтамак авылында туган. 1954 елда Башкорт дәүләт педагогия институтының филология факультетын тәмамлаганнан соң юллама буенча Раевка 1нче урта мәктәбенә эшкә килә.

-Бердәм һәм тату коллективта бер гаиләдәге кебек җылы мөнәсәбәт һәм ярыш чәме хакимлек итә иде. Без бер-беребездән эшләргә өйрәндек, бергәләп осталыгыбызны камилләштердек. Утыз алты ел педагогик эшчәнлекнең утыз дүрт елы шушы мәктәптә үтте, - дип искә ала Тайфа Шакир кызы. – Тормышымның иң бәхетле, алтын еллары иде улар.

Шушы еллар укытучыга уңыш, республика дәрәҗәсендә танылу, ихтирам һәм хөрмәт алып килә. Галимнәр, тел белгечләре югары бәһалаган педагогик тәҗрибәсе, методик эшләнмәләре башта районда, соңыннан республикада киң тарала. Тайфа Шакир кызына 1973 елда “Русия Федерациясенең халык мәгарифе алдынгысы”, ә 1983 елда “Укытучы-методист” дигән мактаулы исемнәр бирелгән. Бу мәктәптә Башкорт дәүләт университеты филология факультетының башкорт бүлеге студентлары практика үтә. Башкорт әдәбиятынең күренекле эшчәннәре Әхмәт Сөләйманов, Рәшит Шәкүр, Тимергали Килмөхәммәтов, шагыйрьләр Ирек Кинҗәбулатов, Риф Мифтахов һәм Тимер Йосыпов та шушы белем учагында тәүге сынауны үтә.

Калыпларга иярмәгән, үз эшенә иҗади караган укытучы укучыларына башкорт теленең бөтен матурлыгын һәм нечкәлеген җиткерергә тырышкан, аны хөрмәт итәргә өйрәткән. Тайфа Шакир кызының республикабыз югары уку йортларының башкорт теле һәм әдәбияты факультетларын тәмамлап, аның эшен дәвам иткән алтмышка якын укучысы да шушы фикер белән килешер дип уйлыйм. Алар арасында – Закуан Әхмәтов, Айдар Солтанголов, Фәния Галимова, Зәйтүнә Даянова, Мөнир Шәйхетдинов һәм башкалар бар. Нәкъ Тайфа Шакир кызы Гөлфия Юнысованың беренче шигырьләрендә аның сәләтен күрә һәм әдәбият дөньясына фатыйхасын бирә.

Тайфа Шакир кызы бүген дә элекке укучылары өчен тугры дус һәм киңәшче булып кала, аларның уңышларына чиксез шатлана, уңышсызлыклары булса, алар белән бергә борчыла. Укучылары да еш кына яраткан укытучыларының хәлен белергә килә. Шундый һәр очрашу – чын тормыш дәресе ул. Бүгенге чынбарлыкны тыныч кына, түземлек белән кабул итүче, зирәк акыллы, рухи дөньясы бай булган хөрмәтле мөгаллимәгә карап сокланмый мөмкин түгел. Ирексездән, хатын-кыз һәр яшьтә дә матур булып кала, дип уйлап куясың. Йөзендәге сырлар да аны бер дә картайтмый, киресенчә җылы кояш нурлары кебек балкый.

Шушы көннәрдә Тайфа Шакир кызына 90 яшь тулды. Туган коллективы, төрле елларда мәктәп тәмамлаучылар аны күркәм гомер бәйрәме белән тәбрикләп, ныклы сәламәтлек һәм иминлек теләде. Якыннары белән бергә алтын көзнең чагу балкышына, ябалаклап яуган көмештәй тәүге кар бөртекләренә, язгы умырзаяларга һәм җәйге чык тамчыларына тагы да бик күп еллар шатланырга язсын әле.

Фәнүрә ГАЛИМОВА,