Уфа уртасында машинага төбәп аткан

Уфада "Porsche Cayenne" автомобиле хуҗасы юл конфликтында башка автомобильгә ата, дип хәбәр итәләр Башкортстан буенча Эчке эшләр министрлыгынан.

Башкаланың Октябрь проспектында ул "десятка" йөртүчесе белән низагка кергән.
Безнең ил машинасы "Үсмерләр китапханәсе" тукталышы янында туктаган. Аның янына чит ил машинасын йөртүче йөгереп килгән һәм травматик пистолеттан машинаның пыяласына аткан. Нәтиҗәдә, пыяла зыян күргән, ә водитель җәрәхәт алган.

Оператив рәвештә эшләгән ЮХХДИ хезмәткәрләре тиздән шикләнелүчене тоткарлаган, ул Черниковка бистәсеннән 50 яшьлек ир булган. Аңа карата "Хулиганлык" мәддәсе буенча җинаять эше кузгатылган.