Студентларга тормышта үз юлын табарга ярдәм итү өчен

Республика ветеринария идарәлеге җитәкчелеге һәм район ветеринария станцияләре башлыкларының булачак белгечләр белән традицион очрашуының максаты менә шундый.

Бу юлы да чара кунакларны уку процессы, заманча һөнәри остаханәләрнең мөмкинлекләре белән таныштыру өчен генә түгел, ә иң мөһиме, студентлар булачак һөнәрләренең үзенчәлеге, республикада агросәнәгать комплексы яшь белгечләренә дәүләт ярдәме чаралары, агросәнәгать предприятиеләрендәге вакансияләр һәм хезмәт шартлары турында тәүге чыганаклардан белсен өчен оештырылды.

Студентлар алдында республиканың ветеринария идарәлеге җитәкчесе Азат Җиһаншин, район хакимияте башлыгы урынбасары - авыл хуҗалыгы бүлеге җитәкчесе Данир Әхмәдышин, Әлшәй район ветеринария станциясе җитәкчесе Хәлил Шәрипов чыгыш ясады. Колледж директоры Ришат Әбделвәлиев, үз чиратында, борынгы уку йортының бай тарихы, мәгариф, тәрбия һәм спорт эшчәнлеге, әзерлек юнәлешләре турында сөйләде.

Кунаклар һөнәри остаханәләрдә булды, булачак ветеринарларга тармактагы эшләр торышы турында сөйләде, эшкә урнашу мөмкинлекләре белән таныштырды, студентларның эш шартлары һәм таләпләр турында сорауларына җавап бирде.

Очрашу ветеринария идарәлеге һәм Әлшәй районы җыелма командасы белән Н. Сибирцев исемендәге Аксен агросәнәгать колледжы студентлары арасында иптәшләрчә волейбол матчы белән тәмамланды. Турнир бассейнлы “Виктория” физкультура-савыктыру комплексының спорт залында үткән беренче ярыш булды. Ярыш нәтиҗәләре буенча район ветераннар командасы җиңү яулады, ветеринария идарәлеге хезмәткәрләре - икенче, ә колледж студентлары өченче урынга чыкты.

Колледж җитәкчелеге билгеләвенчә, мондый очрашулар бик мөһим, чөнки алар студентларга потенциаль эш бирүчеләр белән танышырга, киләчәктә тормышта үз юлын табарга, шулай ук колледжның үзендә үк эшкә урнашу проблемасын хәл итәргә мөмкинлек бирә.