Уфада Башкортстанда узачак VI Бөтендөнья фольклориадасы программасын игълан иттеләр

Уфада Мәдәният министрлыгы коллегиясенең киңәйтелгән утырышында VI Бөтендөнья фольклориадасы программасы белән таныштырдылар.

-Катнашучылар Уфага 16 һәм 17 июльдә килә.

-Ачылу тантанасы Уфада 18 июльдә «Уфа-Арена»да узачак.

-18 июльдә илнең барлык төбәкләрендә фольклор һәм халык иҗаты фестивальләре узачак.

-19 июльдә башкаланың «Башкортстан» Дәүләт консертлар залыннан «Торатау» Конгресс-холл амфитеатрына кадәр милли киемнәрдә катнашучылар парады узачак.

-19 июльдән башлап 14 көн дәвамында, «Торатау» Конгресс-холл амфитеатрында үзәк мәйдан буларак «Фольклориада йөрәге» эшләячәк.

-Ябылу тантанасы 1 августта, шулай ук амфитеатрда узачак. Биредә Фольклориада әләмен киләсе кабул итүче илгә тапшырачаклар. Бүгенге көндә ул ил әлегә сайланмаган.

-20 июльдә килгән кунакларның күпчелек өлеше фестиваль округлары буенча таралачак.

-20 июльдән 31 июльгә кадәр республиканың барлык муниципаль берәмлекләрендә фестиваль чаралары узачак. Республика 10 фестиваль округына бүленә. Һәр округка 7-10 ил җибәреләчәк. Төрле илләрдән килгән коллективлардан тыш, һәр мәйданчыкка үзебезнең җирле коллектив чыгышы да тәкъдим ителергә тиеш. Мәҗбүри таләп -тере музыкаль озата бару.

-Фольклориадада катнашу өчен 31 гыйнварга кадәр гаризалар кабул ителде. Дөньякүләм чарада катнашуга 85 ил гариза тапшырган иде. Шуларның алтысы исемлектән төшеп калды: Доминикан, Куба, Малайзия, Оман, Уганда һәм Филиппин,- дип ачыклык кертте Республика халык иҗаты үзәге генераль директоры Артур Алибәков.

Фестиваль программасында матур костюмлы урам парадлары, концертлар, декоратив-гамәли сәнгать осталарының күргәзмәләре, мастер-класслар, төрле интерактив мәйданчыкларның эше, төрле халыкларның милли уеннарын үткәрү каралган. Барлык мәйданчыклар да бердәм сценарий буенча эшләячәк. Барлык мәйданчыкларның концепциясе бердәм: җиһазландырылган сәхнә, һөнәрчеләр өчен павильоннар яки юрталар, традицион уеннар өчен мәйданчыклар.