Ноябрьдә бакча эшләре

Агачлардан яфраклар коелу һәм көннәрнең салкынайтып торуы һич тә бакчада эшләр тәмамланды дигән сүз түгел әле. Чөнки, җир туңа башлаганчы шактый эшләр башкарасы бар.

Салкыннар ныклап башланганчы, җиләк-җимеш куаклары һәм агачлары тирәли көзге ашламалар кертеп калыгыз. Ашлама составында азот булмасын, ә менә бакыр, марганец, калий, бор һ.б. микроэлементлар бик яхшы булачак.

*Һәр зур алмагач һәм груша төбенә 30-50 кг. черемә, 300 г. суперфосфат, 200 г. калий сульфаты кертелә. Чия һәм слива агачларына ашлама ярлырак булса да ярый. Аны 1 чиләк суга 3 аш кашыгы суперфосфат һәм 2 аш кашыгы калий сульфаты салып әзерлиләр. Һәр зур агачка ашламаны икешәр бидрә исәбеннән кертәләр. Шулай ук бакча магазиннарыннан микроэлементлар кушылган махсус туклыклы комплекслар да сатып алырга була (аларның тышлыгына “Көз” дип языла). Инструкция буенча кулланыгыз.

Ашламаларны агач кәүсәсе тирәли сибегез һәм туфракны 30 см. тирәнлектә чокып, җиргә кертегез.

Ноябрьдә бакчага яңа тирес кертергә дә мөмкин. Кыш айларында ул череп, язын үсемлекләргә шифалы ашламага әйләнер.

Фото: https://pixabay.com/