“Дөньяны күңел җылысы белән җылытасы иде”

Минем алдымда шагыйрә, якташыбыз Венера Хурамшинаның башкорт, рус һәм итальян телләрендә язылган шигырьләр җыентыклары ята. Шушы көннәрдә Венера Ягафәр кызы безнең редакциядә булып, үзенең иҗади планнары белән уртаклашты. Яңа шигырьләрен укып ишеттерде һәм әле басылмаган әсәрләре язылган дәфтәрләрен күрсәтте.

Ул Ташлы авылында туып-үскәнн. 1966 елда ире белән Псков өлкәсенә хәрби шәһәрчеккә күченәләр. Монда кызлары Светлана һәм уллары Рөстәм дөньяга килә. Анда Венера Ягафәр кызы комсомол оешмасы секретаре урынбасары булып эшли. 1974 елда гаиләсе белән Кыргызстанга күченәләр. Балалар бакчасында эшли һәм читтән торып Ош педагогия институтында мәктәпкәчә белем бирү педагог-психологы белгечлегенә укый. 1989 елда туган якларына әйләнеп кайталар. Монда да ул 6 нчы балалар бакчасында педагогик эшчәнлеген дәвам итә. Кыскартуга эләккәч, Италиядә эшләү турында уйлана башлый, анда аның ахирәтләре эшкә киткән була.

Кояшлы Италия аның күңелендә якты эз калдырган. Кичерешләренең барысы да шигырьләрендә чагылыш тапкан. Дөньяга карашы үзгәргән. Венера Ягафәр кызы “Илһам" халыкара әдәби-музыкаль клубы әгъзасы булып китә. 2011 елда «Я сердцем, Родина с тобой» исемле беренче китабы дөнья күрә. Аның шигырьләре «Италия ярларында», «Чит ил җире нинди сер саклый», «Илһам өчен чикләр юк» һәм «Иҗат итүче безне иҗатка илһамландыра» җыентыкларында да басыла. Аларда туган як, Туган илдән ерактагы тормыш турында хатирәләре чагылыш тапкан. Ул Донбасста яшәгән ахирәтләренең кайгысына да битараф калмый. Венера Ягафәр кызы күрше илдә барган вакыйгалар га карашын «Янган, әмма бирешмәгән» дип аталган шигъри җыентыгында, Донбассның «Әдәби журнал» вакытлы басмасында басылып чыккан шигырьләрендә чагылдырган.

Бер елдан «Мин туган Башкортстанымның кызы" дигән китабы дөнья күрә. Бу ел якташыбыз өчен җимешле була. Яңа шигырьләре туа, чираттагы җыентык өчен наброскалар ясала, ә аннары шигырь укучылар аның “Дөньяны күңел җылысы белән җылытасы иде” дип аталган китабын кулына ала. Әлеге китапның исеме үзе дә күп нәрсә: кеше кайгысына битараф булмаган, аны аңлаган, кешеләрне берләштерә алган, аларга ярдәм кулы сузган изге күңелле хатын-кыз-шагыйрә турында сөйли.

Чит илләрдә безнең хатын-кызларга җиңел түгел, аларга ярдәм кирәк. Читтә гомер итүнең бөтен авырлыкларын үз иңендә тойган Венера Ягафәр кызы Соррентода республикабызның 615 хатын-кызын берләштергән «Сулпан» башкорт ассоциациясен оештыра. Русиянең башка төбәкләрендәге берләшмәләр белән хезмәттәшлекне җайга сала.

Бүген ул туган ягында, гел бәйләнештә, Раевка авылыннан бер хатын-кызның хәле турында борчыла. Бу хатын бик авыр хәлдә, аны туган ягына алып кайтырга кирәк. Венера Ягафәр кызы шул хатынга ярдәм йөзеннән коллегалары арасында акча җыюны оештырган.

Нәкъ менә шундый гамәлләр кешенең асылы, аның ярдәмчеллеге, мәрхәмәтле йөрәге турында сөйли. Аның шигырьләре дә шул хакта…