“Мир” картасына күчү вакыты ел ахырына кадәр озайтылды

Русия банкы пенсионерлар һәм социаль пособие алучыларга “Мир” картасына күчүне 31 декабрьгә кадәр озайтты.

Милли түләү системасы карталарына мотлак күчү вакыты 1 июльгә кадәр тәмамланырга тиеш иде, әмма ул пандемиягә бәйле тәүдә 1 октябрьгә кадәр, ә хәзер ел азагына кадәр озайтылды. Шул ук вакытта хаклы ялдагыларга пенсияләрен элеккечә алу мөмкинлеге дә саклана: мәсәлән, банктан яки почтадан кулакчага.

Русия Банкы бүлекчәсе – Башкортстан Республикасы буенча Милли банк хәбәр итүенчә, 2021 елдан Пенсия фондыннан пенсия һәм башка түләүләр, йөклелек һәм бала туганнан соң бирелгән пособиеләр, 3 яшьтән 7 яшькә кадәрге балаларга айлык түләүләр, өченче һәм арытабангы балаларга түләүләр “Мир” картасына күчереләчәк.