«Раевсахар» җәмгыяте җитештерү куәтен арттырырга ниятли

Республика Башлыгы Радий Хәбиров онлайн-форматта үткәргән чираттагы «Инвестиция сәгате»ндә Раевка шикәр заводын реконструкцияләү проекты тәкъдим ителде.

Җаваплылыгы чикләнгән «Раевсахар» җәмгыятендә, ул «Иске Нафта» компанияләр төркеменә керә, чөгендер эшкәртү күләмен тәүлегенә 5,5 мең тоннага кадәр җиткерү кузаллана. Инвестор, «Стар Нафта» компаниясенең генераль директоры Мансур Латыйпов проектка 927 млн сум акча салып, шулай ук куәте тәүлегенә 300 тонна гранулланган жом җитештерүче яңа жом киптерү бүлеге төзергә ниятли. Эшкәртү куәтен арттыру хуҗалыклардан чөгендер кабул итү күләмен елына 600 мең тоннадан 800 меңгә кадәр арттыру мөмкинлеге бирә, моның белән экспортка чыгарылучы продукция җитештерү җайга салыначак.

Проект кысаларында завод җитәкчелеге чөгендер эшкәртү куәтен арттыру буенча техник задание әзерләгән. Җиһазлар җитештерүчеләр белән сөйләшүләр алып барыла. Ел ахырына кадәр аны сатып алуга тәүге контракт төзү планлаштырыла. Киңәшмәдә катнашучылар инвестиция проектын өстенлекле проектлар исемлегенә кертүне хуплады. Ул 2021-2022 елларда гамәлгә ашырылырга тиеш.

Фәнүзә СУФИЯНОВА.