Гашыйклар көнендә көлик әле бер

Гашыйклар көнендә хисләргә бирелеп китеп, хатыныма хезмәт хакымны тулысынча тоттырдым. Ни дәрәҗәдә ахмаклык кылганымны аның башка айларда җитми калган акчаларны таптыра башлавыннан соң гына аңладым...

**

14 февральгә сөйгән кызым миңа сыра кружкасы бүләк итте, ә мин аңа – алтын алкалар. Кыргыйларның алтынын ялтырап торган пыялага алдатып алу гадәте әле дә яши, мин сиңа әйтим...

**

14 февраль... 23 февраль... 8 март...

Ә бәлки аларның барысын да бер бәйрәмгә берләштерергәдер: Ватанны саклаучыларга гашыйк хатын-кызлар көне, мәсәлән.

**

–Җаным, син миңа Гашыйклар көненә нәрсә бүләк итәсең?

–Әгәр берни дә бүләк итмәсәм?

–Алайса 23 февральгә бүләк алмыйсың!

–Чынмы? Аллага шөкер, килештек алайса. Яңа елга бүләк иткән носкиларың бар әле.