Мәктәпләрдә янә тематик шимбәләр башланды

Аларның беренчесен гомум “Сәламәтлек көне” һәм өлкән сыйныф укучыларына һөнәри юнәлеш бирүгә багышладылар.

Республика Башлыгы Радий Хәбиров игълан иткән Сәламәтлек һәм актив озын гомерлелек елы кысаларында барлык мәктәпләрдә дә “Сәламәтлек көннәре” узды. 1-6 сыйныф укучылары өчен төрле спорт ярышлары - күңелле стартлар, уеннар, футбол, чаңгы ярышлары, тимераякта шуу, шорт-трек оештырылды. Кышкы уеннар урамда үтте, анда балалар гына түгел, аларның әти-әниләре дә катнашты.

Урта һәм өлкән сыйныф укучылары өчен онлайн-форматта “Һөнәри осталык дәресе” республика һөнәри юнәлеш бирү чарасы әзерләнгән иде. Балалар алдында республиканың төп югары уку йортлары вәкилләре үз уку йортлары турында мәгълүмат белән чыгыш ясады. Укучылар “Яшь һөнәрмәннәр” чемпионат хәрәкәте, “Киләчәккә билет” башлангыч һөнәри юнәлеш бирү проекты турында да белде. Дәреснең икенче өлеше “Профбаттл” уены формасында үтте, анда укучылар иҗади сәләтләрен, тапкырлыгын кулланып, тизлеккә төрле белгечлек һәм һөнәрләр буенча биремнәр үтәде.

Шулай ук бу көнне һөнәри юнәлеш бирүче чара кысаларында Николай Сибирцев исемендәге Аксен агросәнәгать колледжына экскурсияләр оештырылды.

Хәтерегезгә төшерәбез, 2019 елда беренче “Канатлан” мәгариф форумында биш көнлек укуга күчәргә, әмма айга бер тапкыр мәктәпләрдә спорт, тарих, фәнгә багышланган тематик шимбәләр үткәрергә дигән карар кабул ителгән иде.