Чүп-чар өчен барыбызга да түләргә туры киләчәк

Сүз чүп-чар җыю һәм чыгару турында бара. Яңа елдан бу хезмәт түләүле һәм барысы – гражданнар, юридик шәхесләр, барлык авыллардагы малтабарлар өчен дә мотлак үтәлергә тиешле хезмәт булачак. Ә көнкүреш калдыкларын җыю, транспортировкалау, сортларға аеру һәм утильләштерү белән махсус оешмалар – төбәк операторлары шөгыльләнәчәк. Башкортстанда биш зонага дүрт төбәк операторы билгеләнде.

-Әлшәй районы 4нче зонага керә, аукцион нәтиҗәләре буенча безне Туймазыдан “Экология Т” компаниясе хезмәтләндерәчәк, - дип аңлатты район хакимиятенең торак-коммуналь хуҗалыгы мәсьәләләре буенча баш белгече Альбина Сәлихова. – Төбәк операторы хезмәтләре суммасын республиканың Тарифлар буенча дәүләт комитеты раслаячак, көнкүреш калдыкларын алып киткән өчен түләү квартирада яки йортта теркәлгән кешеләр санына карап исәпләнәсәк.

Законга үзгәрешләр кертүнең төп максаты – оешкан рәвештә көнкүреш калдыкларын җыю, ташу, ә иң мөһиме- эшкәртү юлы белән җыелып яткан чүп-чарның тирә-як мохиткә һәм кешеләр сәламәтлегенә начар йогынтысын киметү.