Һәр шоферның яктылык кайтаручы жилеты булырга тиеш

“Гәзиттә ЮХХДИ бүлекчәсе җитәкчесе Салават Котлыев белән әңгәмәне кызыксынып укып чыктым. Анда, шофер таныклыгын алмаштырганда яңадан имтихан тапшырырга кирәкми, дигәнне укып тынычландым. Ә менә тиздән бөтен шоферларга да мотлак кирәк булачак яктылык кайтаручы жилетлар турында бернәрсә дә әйтелмәгән. Алар нинди төстә булырга тиеш яки әллә аерма юкмы?” – дип сорый автоһәвәскәр-пенсионер.

-18 марттан Юл хәрәкәте кагыйдәләренә үзгәрешләр гамәлгә керәчәк, аларга ярашлы, шоферлар авыллардан читтә тәүлекнең караңгы вакытында мәҗбүри тукталган, я булмаса күрү чикләнгән шартларда юлда яки юл читендә туктап торган очракта яктылык кайтаручы материалдан сызыклары булган куртка яки жилет кияргә тиеш, - дип аңлаттылар Русия Эчке эшләр министрлыгының Әлшәй районы буенча ЮХХДИ бүлекчәсендә. – Жилетның төсе әһәмиятле түгел. Ә менә бу кагыйдәне бозган өчен 500 сум күләмендә штраф билгеләнгән.