Кышларда бәхет күрәм

Кышкы көнгә ямьнәр өстәп,
Күрегез, карлар ява.
Энҗе карлар яуган чакта
Сафлана гына һава.
Кышкы юлдан атлаганда
Шыгырдый карлар эздә.
Уфтанмагыз, кыш салкын дип,
Бер мизгел алар бездә.
Ап-ак карлар җемелдәшә,
Сибелә җиргә сәйлән.
Җилләр белән бөтерелә,
Ак карлар әйлән-бәйлән.
Челтәрле ак күлмәгендә
Агачлар бигрәк күркәм.
Сез ничектер, ә мин үзем,
Кышларда бәхет күрәм.
Гөлфия ГЫЙЗЗӘТОВА.