Күктә ике йолдызчык кабынды

Кеше туганда һавада яңа йолдыз кабына, диләр. Менә шундый йолдызчыклар Әлшәй күгендә дә кабынды. 23 мартта 9 сәгать 22 минутта Алина һәм Рөстәм Ахуновларның гаиләсендә - кызлары, ә бер минуттан соң уллары дөньяга килде.

Күктәге һәр йолдызның үз атамасы булган кебек, бәхетле әти-әни дә балаларына Илнара һәм Линар дигән матур исем бирде.

Илнара – гадәти булмаган исем. Аның тарихы берничә йөз ел элек башлана. Тел белгечләре фикеренчә, бу исемдә төрек тамырлары ята, тәрҗемәсе “нурлы”, “ялкынлы” дигәнне аңлата. Линар – гарәп сүзе, рус теленә тәрҗемә иткәндә “Аллаһ нуры”н аңлата.

Әлшәй районының ЗАГС бүлегендә тантаналы шартларда Русия Федерациясенең яңа гражданнары – 2018 елның тәүге игезәкләре тууы теркәлде, яшь ата-анага балаларының беренче документы – туу турында таныклыклар тапшырылды. Анда баланың исеме, буыннан-буынга килгән фамилиясе, туган көне, аңа гомер бүләк иткән әти-әнисенең исеме күрсәтелгән.

Ахуновларның бәхетле гаиләсен шатлыклы вакыйга белән район хакимиятенең яшьләр бүлеге вәкилләре дә тәбрикләде. Алар яшь гаиләгә истәлекле бүләкләр тапшырды. Ә бу тантана турында Алина белән Рөстәм балаларына күп тапкырлар сөйләр, сабыйларын ничек ихлас котлауларын матур хатирәләр белән искә алыр әле.